Willemstad —— Último dianan i simannan polis ta konstatando diferente kaso, kaminda siudadanonan ku trata na bende nan artíkulonan ku tersera, partikularmente telefòn, ta bira víktima di sea ladronisia òf atrako.

E siudadanonan aki ta pone loke nan tin pa bende riba un òf otro media sosial i na momentu ku un persona mustra interes den e artíkulo aki, e ta palabrá ku doño di e propiedat un sitio i orario pa nan topa pa asina por hasi e interkambio di sèn i artíkulo. Ta sosodé ku unabes e ‘kliente’ tuma e artíkulo ku den mayoria kaso ta telefòn pa wak, e ta kore bai ku esaki, sin entregá e doño su sèn. Òf asina ku e doño saka e telefòn, e ‘kliente’ ta ranka e opheto for di su man i hui kuné. E forma di operá aki algun tempu pasá ya tabata tuma lugá i polis a alertá i konsientisá komunidat riba dje. Awor e modus operandi aki a bolbe lanta kabes i ta bon pa bolbe hala atenshon di un i tur riba e práktika maligno aki. Un rekomendashon pa nunka bai hasi e interkambio bo so, ni den oranan di anochi ni na un sitio alehá i trata mas tantu posibel pa e transferensha (pago) tuma lugá ‘on-line’.