Yamil Lasten ayera na rueda di prensa.

Punda—Direktor di Curoil, Yamil Lasten ayera durante un rueda di prensa den Fòrti Amsterdam a anunsiá di ta satisfecho di a yega na e momento di anunsiá ku Kòrsou ta bai risibi un nivel mas haltu di kombustibel.

Segun Lasten, ta trata di un mihó kalidat di kombustibel kual lo rekerí alabes na liñanan nobo di guia. Den e kaso aki ta trata di un nivel di kombustibel unda spesifikashonnan no ta drenta na vigor. Lasten a tuma un tiki tempu ayera pa bolbe splika e proseso kon ta yega na provedornan di kombustibel. Ta trata di un sistema unda kandidato provedornan por registrá na Curoil unda nan ta pasa un proseso bastante rigoroso di kumplimentunan korporativo. Unabes nan kumpli ku e kondishonnan, nan por kuminsá partisipá den sistema di destaho (tendering), unda Curoil ta skohe e mihó preis ku ta kumpli ku e liñanan di eksigensha i spesifikashonnan kondishoná di Curoil. Lasten a bolbe ripití tambe ku kalkulashon di preis ta responsabilidat di BTP. Curoil ta kumpra i paga pa e kombustibel i ta manda nan faktura pa Ofisina di Telekomunikashon i Post, unda einan ta inkluí demas komponentenan pa yega na e preis di kombustibel.

Segun Lasten, na Novèmber próksimo por spera e promé entrega di kombustibel konforme e spesifikashonnan rekomendá pa SGS Inspire, kual kompania a hasi un sondeo riba e kalidat di kombustibel na Kòrsou. Lasten a splika ku mester tene kuenta ku  un periodo di “Flush Out”. Esaki ta un periodo ku e kombustibel bieu i esun nobo ta keda mengua den tanki. Por spera ku na desèmber 2024, klientenan por tin e kombustibel konforme e spesifikashonnan di SGS Inspire. E direktor na Curoil a bisa ku segun pronóstikonan lo tuma 4 luna promé ku e disel flush out miéntras pa gasolin e periodo lo ta ménos, 2 luna.