Nan tabata fuerte durante di e  entrevista riba facebook di Korant Vigilante djadumingu atardi.

WILLEMSTAD,—-Tabata djadumingu den ora nan di atardi ku Vigilante Farándula tabata ‘Live’ riba e plataforma di facebook na Santa Helena i tabata papiando riba di loke ku tabata tumando lugá na salida di marcha grandi i ku esaki a krea un buraku bastante grandi.

Na e momentu ei e telefon di Vigilante Farándula a rin kaminda ku Gianni Jansen-Francisca ku ta kasa di Kenley Jensen a duna di konosé ku “Mi ta bai mandabu un artíkulo p bo pone den korant di loke nan ku ta tumando lugá rondó di nos grupo di Karnaval. Tabata aki nan ku Vigilante Farándula a bisa Gianni ku,”Mi ta live riba facebook di Vigilante si bo ke ta hinkabu den e live ya asina tur hende ta tende kiko bo tin di bisa”. Aki nan Gianni a duna di konosé ku,”Oke ta bon”. Mester bisa ku tantu Gianni i Kenley Jansen a trese nan prekupashon dilanti i esaki a hala bastante atenshon riba e plataforma di facebook di Korant Vigilante. No a dura masha ku Gianni Janse-Francisca manera kue  la primintí e la sa di kumpli tambe,kaminda ku e la manda e artíkulo pa Vigilante Farándula.

Esaki ta e artíkulo di Gianni a manda pa Vigilante Farándula ku ta bisa lo siguiente “Pa medio di e anunsio aki, grupo A’legria ta deseá di trese klaridat pa ku e situashon ku a kousa retraso Djadumingu, 11 di Febrüari, 2024. Djadumingu di Gran Marcha, a surgi un retraso den salida di Grupo A’legria pa motibu di un kòntròl di papeleo dirigí pa entre otro kuerpo polisial. Durante e kòntròl aki a sali na kla ku e number di chasis di e trèker, no tabata kuadra ku e number di chasis ku tabatin riba e keuringskaart di e vehíkulo. E suseso aki ta lamentabel, mirando ku tur trèker, trailer, demas vehíkulo i karosa a pasa keuring manera debe ser, inkluso e trèker ku a keda kontrolá djadumingu di gran marcha”.

“Komo Grupo, nos a hür trèker via di un kompania lokal ku ta ofresé e servisio aki. E mesun trèker ku a keda pará Djadumingu di Gran Marcha, a kore sin ningun problema durante marcha hubenil i tambe tiner parade. Nos komo maneho di Grupo A’legria ta partisipá i invertí den karnaval ku hopi amor, dedikashon, i pashon. Na momento ku nos ta partisipá i manehá for di un distansha, ta difísil pa nos por kontrolá delaster un detaye pa evitá situashon nan manera a surgi djadumingu. E gran mayoria di lokual nos ta regla ta hasí for di un distansha i basá riba konfiansa den tur partido ku nos ta traha ku ñe. Nos ta deseá di klarifiká na pueblo di Kòrsou ku nos komo maneho di A’legria no ta kontra di kòntròl, mirando ku e seguridat di tur partisipante i tambe pueblo kantu di kaminda mester ta na promé lugá”.

“E situashon ta lamentabel, pero manera nos tema ta indiká, nos kier pone énfasis riba positivismo, i despues di a kumpli ku e nesesidat nan, nos a subi kaya ku bon ambiente, hopi smak i nos a duna tur ku nos tin pa pone un bon show pa pueblo. Djamars próksimo dia di despedida nos lo hasi igual, pa asina sera karnaval 2024 ku AMOR, UNION, KARIÑO, FORSA i POSITIVISMO”.