Enkuestadónan ta subi kaya pa asina kuminsá ku e enkuestanan digital.

WILLEMSTAD, — Enkuestadónan di Senso a prepará nan mes riba e preguntanan riba e lista di enkuesta i tambe riba e parti atministrativo digital.

Ya komo ta konosí Senso su enkuestadónan lo yuda kolektá informashon ku lo wòrdu uzá dor di Ofisina di Statistik(CBS) pa registrashon di informashon nashonal di statistik. Ta importante pa nota ku informashon personal lo keda anónimo. E informashon kolektivo aki di nos pais lo yuda informá interesadonan lokal ku ke por ehèmpel lanta un negoshi, rapòrtá òf ta yuda hóbennan uza informashon di statistik pa hasi tarea di skol. E informashon aki pues ta unu ku ta yuda diferente di nos hendenan i organisashonnan lokal i tambe por uza e datonan aki na nivel internashonal.

Koperashon ku enkuestadónan di Senso ta sumamente importante pa benefisiá nos hendenan lokal i tambe duna un bon representashon di nos pais na nivel internashonal. Pa un bon preparashon i pa proseso di enkuesta por bai mas lihé ta pidi pa check e preguntanan ku lo wòrdu hasí riba wèpsait di senso https://senso.cbs.cw/cheklist-pa-senso-2023.

Enkuestadónan di Senso ta subi kaya tur dia den luna di sèptèmber i te ku 20 di òktober entre 9 or di mainta pa 8 or anochi.