Propósito: GSH ta kumpliendo ku nan propósito…paga e debe bèk. Riba e foto Camillo Bakhuis i Tom Domhoff den entrevista ku Lilo Sulvaran di Vigilante.

Skalo—E debe di 170 mion florin ku gobièrnu di Kòrsou a tuma  serka Hulanda, pa areglo di Giro, ta pagando bek. E vehíkulo di propósito múltiple, Giro Settlement Holding e siman aki ta bolbe bai paga un suma mionario bek di e fiansa. Te ainda nan a paga 49 mion florin bèk.

Durante 2022, manera ampliamente publiká i konfirmá ofisialmente,  Giro Settlement Holding a paga bek 49 mion for di un fiansa di 170 mion florin. E repago durante 2022, tabata konserní retrasonan di 2021. Ta keda ainda kasi 121 mion florin i pa 2023, kosnan ta mustra mes bon pa e “special purpose vehicle” kende a siman aki ta bai anunsiá ku mas pago bek ta bai tuma lugá. Direktor en konhunto, Camillo Bakhuis no tabata kier a bai den detaye pero a konfirmá ku e anunsio tei bini.

Durante 2022, riba 27 di yüli 2022 GSH a paga bek un total  di NAf 49 mion riba e fiansa di Naf 170 mion ku Pais Kòrsou a hasi serka Hulanda. Esaki komo konsekuensia di un rekuperashon eksitoso durante  2021 riba e portafolio di fiansa di Girobank. Ku e pago aki den un tiru, a kumpli ku pago di kasi 30% di e fiansa i GSH a logra pa durante  un aña paga bek kasi kuater biaha e montante palabrá ku mester amortisá  pa aña na Pais Kòrsou.

GSH a bira un propósito speshal den rekuperashon di kliente na momento den Mart  2021 Hulanda a suministrá  un fiansa liber di interes di NAf. 170 mion na Pais Kòrsou, pa paga mas ku 2.000 depositante di Girobank N.V. te na un montante máksimo di NAf. 1.2 mion. E demas 30 depositantenan a keda ku un “claim” di balornan mayor ku Naf 1.2 mion. E depositantenan aki ta prinsipalmente fondo di penshun, fundashon, direktiva  di skol, entidatnan (semi)gubernamental i empresanan finansiero.  Durashon di e fiansa  ta 15 aña. Kada aña na final di yüli, mester amortisá mínimo  NAf. 11.3 mion. Durante 2022 a amortisá kasi 50 mion florin ku ta por lo ménos 4 biaha mas mihó ku e espektativa.

Pa permití  GSH paga e fiansa di Pais Kòrsou bek, e portafolio total  di Girobank ku mas di 9.000 fiansa a wòrdu  transferí dor di Girobank pa GSH na Aprel 2021. Di esaki un parti signifikante tabata improduktivo (non-performing).  GSH ta traha ku un tim chikitu  di profeshonalnan di finansa i bankario, spesífikamente  entrená  pa yega na un esenario di maneho i ehekushon efektivo  di un portafolio grandi.

E siman aki, e dos direktornan, Tom Domhoff i Camillo Bakhuis a keda di hasi un anunsio públiko.