Tom Domhoff i Camillo Bakhuis, direktornan GSH.

PUNDA– Un grupo di alrededor 30 depositante mester warda mas aña promé di risibi nan depósitonan bèk ku tabata riba kuenta na Girobank. Un kantidat di fundashon, entre nan FKP, RK Schoolbestuur i SOAB ku diferente otro mas, no a logra saka nan sèn ku tabata pegá na Giro.

E notisia no ta nada nobo, pasobra Giro Settlement Holding na diferente okashon a splika e proseder, despues di a tuma enkargo pa e.o distribuí sèn pa eks tenedónan di kuenta na Giro.

Por ehèmpel, unu dje fundashonnan ku tambe a keda perhudiká ta SOAB. E ofisina di kompatibilidat atministrativo estatal, tabatin 3.9 mion florin riba su kuentanan na Giro. E sèn di SOAB a keda pegá despues ku na Novèmber 2019,  atministrador di SOAB a duna Giro órden pa traspasá 2 mion florin di nan kuenta pa un kuenta na MCB Bank. E sèn mester tabata riba kuenta di SOAB promé ku 3 di desèmber 2019. Pero esei nunka no a tuma lugá. Na yanüari 2020, SOAB a inisiá un wisio sivil kontra di Giro, kual nan a pèrdè den korte i kual a sirbi alabes pa tur tenedónan di kuenta riba 1 mion florin na Giro, aseptá e desishon di korte. E temporada ei, SOAB, huntu ku 2 mil kliente mas tabata entre e 2% ku no tei hañá nan sèn (ainda), sin un desishon di GSH. Entretantu GSH a kuminsá los sèn pa tur depositantenan te ku 1.2 mion florin.

Hopi kliente na Giro a keda perhudiká despues ku Banko Sentral a emití e moratorio riba kuentanan di Giro. Esaki a tuma lugá riba 10 di desèmber 2019. Segun abogado di Banko Sentral, CBCS, Mayesi Hammoud durante unu di e tratamentunan, Giro mester a paga konforme interes general en bes di interes individual. Esaki ta lokual a bini dilanti durante un  wisio sumario entamá pa SOAB kontra di Giro/ Banko Sentral. Wes a respetá e desishon ku Giro tabata bou di un medida di emergensha i lei ta protehá e banko pa keda sin paga tur depositante nan sèn.

Den Mart  2021 Hulanda a suministrá  un fiansa liber di interes di NAf. 170 mion na Pais Kòrsou, pa paga mas ku 2.000 depositante di Girobank N.V. te na un montante máksimo di NAf. 1.2 mion. E sobra 30 depositantenan a keda ku un “claim” di balornan mayor ku Naf 1.2 mion. E depositantenan aki ta prinsipalmente fondo di penshun, fundashon, direktiva  di skol, entidatnan (semi)gubernamental i empresanan finansiero. Entre nan tin FKP. Durashon di e fiansa di 170 mion ta 15 aña. Kada aña na final di yüli, mester amortisá  mínimo  NAf. 11.3 mion. Pero den dos aña, GSH a amortisá kasi 100 mion florin bek, lagando atras 72 mion florin ainda pa repago amortisá.