Moshon Imposibel: Parlamento a manda Gobièrnu riba un Mishon Imposibel di buska 19 mion florin di FKP na GSH.

PUNDA—Un biaha mas Parlamento di Kòrsou a mustra nan arogansia i negligensha, despues di a manda un “moshon imposibel” pa Gobièrnu di Kòrsou wak e posibilidat di tuma 19 mion di FKP ku tabata pegá na Giro.

For di 2021, despues di tratamentunan den parlamento riba Giro i hasta te ku 2023, Parlamento a diskutí ampliamente riba 170 mion di fiansa pa rekuperá kuentanan di krédito di depósitonan mionario na Giro. Pa tal motibu ta kompletamente inkomprendibel, kon mesun Parlamento ta sostené un moshon pa buska 19 mion di FKP bek na Giro. Un “Mishon i Moshon Imposibel”.

Manera ta konosí, riba 10 di desèmber 2019, Banko Sentral pone un moratorio riba Girobank N.V. (Girobank), mediante kua a fris e fondonan ku tabata surpasá NAf 10.000 riba e kuentanan koriente i di spar na Girobank. Riba aprobashon di Parlamento i Gobièrnu di Kòrsou, , GIRO Settlement Holding N.V (GSH) la keda inkorporá pa paga gran parti di e fondonan kongelá. Di e manera ei, mayoria di e titularnan di kuenta di Girobank lo por disponé libremente di henter nan depósitonan. Despues di e moratorio, a kuminsá suavisá tambe pa depósitonan ku ta surpasá NAf 1.200.000. A keda kumbiní ku GSH lo paga te na un máksimo di NAf 1.200.000. Pa risibí e pagonan ku GSH ta bai hasi, un titular di kuenta por transferí e fondonan pa un kuenta na un otro banko di su preferensia.

Diferente biaha a keda anunsiá públikamente ku e pagonan ku GSH ta bai hasi di e depósitonan serka Girobank te na e montante máksimo di NAf 1.200.000 ta ser prefinansiá ku un fiansa ku interes di 0% na balor di NAf 170.000.000 ku Hulanda a hasi Kòrsou. Dia 28 di desèmber 2020, GSH a ser lantá ku e meta di tuma Girobank su portafolio di fiansa i sigui manehá i kobrá e fiansanan aki. GSH lo usa e entradanan optené di maneho i kobransa di e portafolio di fiansa pa paga e fiansa di Hulanda bèk. Kòrsou i GSH tin palabrashon hasí al respekto ku lo keda fihá den un akuerdo.

Ora kaba di paga e fiansa na Hulanda, konforme su deber statutario, GSH lo usa tur demas entrada di maneho i kobransa di e portafolio na benefisio di e titularnan di kuenta ku saldo riba NAf 1.200.000. Na su debido tempu lo informá e titularnan di kuenta akí al respekto. Pues lokual GSH ta instruí konforme Kódigo pa Kumplimentunan Responsabel ta pa na promé lugá pago di depositantenan te ku 1.2 mion florin i despues a largo plaso demas depositantenan.

Tur e informashonnan menshoná tabata bon konosí for di Mart 2021 den Parlamento. Pa motibunan ineksplikabel, parlamento ta pasa un Moshon imposibel pa komprondé.