Forensiko: tabatin bastante investigashon forensiko den kaso di Paulina.

Kura Piedra—E tim investigativo ku ta trahando riba e kaso di Shairon Paulina, no ta biniendo kla si deskonosínan a bai laga e hòmber morto òf bibu den un vehíkulo, 6 di aprel último. Djarason tabatin un tratamentu den korte ku a duna indikashon riba desaroyo di e kaso.

Riba  dia menshoná, alrededor di 06.21’or di mainta, Sentral di Polis a risibí informashon ku tin un vehíkulo sospechoso stashoná den área di Kanga ku un hòmber ku no ta duna señal di bida. E unidat ku e yega na e sitio a tuma nota di un hòmber den e vehíkulo ku no ta duna señal di bida i ku herida di bala parti ariba di su kurpa.  E hòmber tabata sintá na e otro banda di e shofùr pero su kurpa a bai len na e banda unda e shofùr mester ta sinta.  Por a mira ku e hòmber den e outo tabata kompletamente na pretu bisti i ku hanskun di plèstik kolo hel na su mannan.  Mesora a kuminsá ku mas investigashon i a bin tuma nota ku aki ta trata di e konosido di Polis i tambe Hustisia Shairon Paulina ku  dos aña pasá a sali den liber despues di tabata sinta un kastigu di bida largu.

No a keda determiná si esnan kende tabata den e vehíkulo ku Paulina , a bai lag’é atras bibu òf morto. Paulina a bin fayesé despues ku un polis sivil a los bala riba dje durante un atrako. Tabata den oranan di anochi riba 5 di aprel ku Polis a haña e informashon ku na e minimarket Kon Xing na St Kittsweg mester tin un atrako den progreso unda tabatin losmentu di bala. Polis ku a bai na e sitio a keda informá ku ta un kolega di nan na sivil ku na momento di e atrako tabata den e establesimentu mester a los tiru dirigí riba e atrakadó kual a pone ku e la kore bai kai pafó di e establesimentu pa despues un otro suheto ku tabata den un vehíkulo blanku mester a baha i yud’é pa hink’é den e vehíkulo i asina a kore bai for di e sitio. Den e mesun vehíkulo a bin haña Paulina morto.

Riba djabièrnè 12 di mei 2023 alrededor di 08.15’or, Tim di Atrako a hasi detenshon di un dama sospechoso A.S.F., nasé na Kòrsou di 31 aña di edat. E detenshon ariba menshoná a tuma lugá den área di Bonam. E detenshon mester tabata relashoná ku e kaso di Paulina. Pero ainda no ta determiná si e dama tabata e shofùr kende a bai laga Paulina atras morto.

Aparte di e morto mes, a inisiá un investigashon tambe na Reshèrshi Nashonal. “Landsrecherche” despues di a laga konfiská e grabashonnan mesora pa kuminsá ku nan investigashon i a interogá e agente polisial ku den su bida diario na trabou ta un reshèrshi basta ehemplar. Pero durante di e trayektoria ku e investigashon a bin ta kana a bin ripara ku ta trata di hasi e agente polisial un sospechoso pa ku uso di su arma reglamentario unda un persona den e kaso aki un atrakadó a keda mortalmente herida. A bin tuma nota ku  Landsrechershe a tratando na yega na e ponensia ku e reshèrshi tabata trahando den e establesimentu komo bewaker i a hasi uso di su arma reglamentario pa asina por a tira e atrakador kual ta kontra di lei. Sigur e ponensia aki tin un kantidat di kolega di e reshèrshi basta indigná ya ku no wak ku e la frustra un atrako arma pero awor ta wak kiko ta e motibu ku e tabata den e negoshi unda e tipo a bai pa kometé e atrako. Ta tratando na tur manera pa hinka e reshèrshi den un huki pa trata di mustra ku e no tabata den e negoshi so komo un kliente òf komo un amigu di e doño pero komo un bewaker pa e negoshi ku a tira ku arma di polis. E kaso ta sigui bou di investigashon.