WILLEMSTAD,—-For di djabièrnè tantu durante i tambe despues di presentashon di agrupashon musikal “Zudup Hopi Forsa” den festival “Un Kanto pa Kòrsou”, ku a tuma lugá den “Curaçao Festival Center”, hopi hende a keda komentá di nan presentashon ku e parti metal, esta ku e parti ‘brass’
Ta asina ku agrupashon musikal “Zudup Hopi Forsa” a kompañá dos kantante i esakinan tabata Andira Reenis, kende a partisipá ku komposishon i areglo di Hubert ‘Bert’ Sambo i Anamarie Cijntje, kende a partisipá ku komposishon di Ike Jesurun i areglo di ‘Bert’ Sambo.
Vigilante Farándula a drenta den kontakto ku e legendario músiko kantante kompositor Kenneth Doran i a bisé di e tantísimo reakshonnan ku Vigilante Farándula a risibí i esakinan tur ta komentá di e presentashon di djabièrnè tras di lomba, kaminda ku a kompañá 2 kantante, i ku hopi hende ta bisa ku e agrupashon tin ku kuminsá move ku e parti ‘brass’.
Kenneth a reakshoná i bisa: “Bo sa ku den pasado kaba tabatin e interes di nos parti pa ku esaki, pero pa un motibu òf otro e no bai sigui mas. Pero bo tin rason, ta masha hopi reakshon i kòmplimènt tantu mi persona, pero tambe otro músikonan a haña di e forma kon nos a presentá den “Un Kanto pa Kòrsou”.
Mi por bisa bo ku enbèrdat e pensamentu tei i asta mi por bisa bo ku e plan tei. Nos ta pensando esaki fuerte, pero nos no ta pura ku nada, de paso mi kier a felisitá e dos kantantenan ku nan tremendo presentashon i tambe tur e músikonan ku a duna di nan parti pa asina por a kompañá e dos kantantenan den gran forma i mi no ke lubidá e tres músikonan ku a perkurá pa e parti di ‘brass’, kende nan a hasi un tremendo trabou”.