Willemstad – Ministerio di Hustisia, huntu ku Direktorado di Relashonnan Eksterior, ta hasiendo tur esfuerso pa e buelo di repatriashon pa Venezolanonan, ku mester a tuma lugá dia 22 di mart último, por sigui dia 8 di mei próksimo.

Na e momentunan aki tin vários Venezolano na Kòrsou ku, debí na diferente faktor, ta deseá di regresá nan pais. Aparte di esaki, tin personanan prosedente di Venezuela ku na e momentu aki ta detené en espera di regreso pa nan pais. Esaki despues di a trata di drenta Kòrsou di forma indokumentá, òf despues di a drenta di forma legal, òf ku no a hasi e petishonnan nesesario pa estadia legal i a bini den kontakto ku hustisia. Ainda no tin buelo komersial entre Kòrsou i Venezuela ku por fasilitá e personanan aki regreso na nan pais. Teniendo kuenta ku esaki, Minister di Hustisia ta den kombersashon ku Kònsùl di Venezuela, pa logra realisá un buelo humanitario pa dia 8 di mei próksimo. 

Por lo pronto, pasashinan pa e buelo aki ta na benta te ku 27 di aprel prόksimo pa mas tarda 6’or di atardi na Curaҫao Handling Agent na Pietermaai Parking Mall. E preis ta Naf 405,– inkluso ‘airport tax’.  Pa e buelo aki, lo tin un kantidat di lugá limitá disponibel. Pa e buelo aki, ta eksigí un PCR-test negativo hasí 48 ora promé ku e buelo, ku ta demostrá ku e persona konserní a tèst negativo pa Covid-19. Mas informashon ta optenibel via e link aki:  https://bit.ly/VUELODEREPATRIACIÓN  

Ta bon pa remarká ku Venezolanonan ku pa un òf otro motibu a drenta Kòrsou na un forma ilegal, lo no bini na remarke pa e trayekto di  ‘Integrashon Responsabel’. Si e personanan aki disidí di biaha boluntariamente i no a risibí un desishon di ekspulshon anteriormente, nan lo no risibí un desishon ministerial di ekspulshon (verwijderingsbeschikking). Konsekuentemente, nan lo no ta prohibí pa regresá Kòrsou denter di 3 aña i lo por hasi un petishon pa estadia legal despues di a bandoná Kòrsou.

Si tin residente di Kòrsou ku ainda ta pegá na Venezuela, nan tambe por hasi uso di e buelo aki i laga kumpra nan pasashi na Curaҫao Handling Agent. Den kuadro di desaroyonan pa ku Covid-19, nan mester tene kuenta ku e reglanan vigente pa entrada, ku ta deskribí riba www.gobiernu.cw.